قصة الاحلام بقلم كريم محمد
هو احنا لما بنحلم .. بنروح فين؟
سؤال دايمًا بييجي في دماغي كل ما أصحى من حلم غريب أو كابوس
هو الحلم ده كان مجرد خيال؟ ولا أنا فعلاً كنت في حتة تانية؟
في ناس بتقول إن الروح بتسافر، وفي ناس بتقول إن الأحلام رسايل من اللي راحوا، أو تحذيرات من اللي جاي.
أنا هحكيلكوا حاجه حصلت لوحدة من المتابعين بقالها سنين، ولسه لحد النهاردة مش قادرة تنساها.
علشان في أحلام بتبقي مش أحلام
في أحلام بتكون وداع
أو إنذار
بس الأصعب من كده، إنك تبقى عارف اللي جاي ومش قادر تمنعه.
كل حاجة بدأت سنة 2018، لما انفصلت عن جوزي
وكان
بعدها بكام يوم، جالي حلم .. حلم خلى الدم ميمشيش في عروقي.
شوفت راجل غريب
قرب مني وقالي بصوت هادي
"أنا ساحر وهتحصل حادثة قريب، وهيكون في موت"
أنا شوفت دم
شوفت الست اللي خاني معاها
صحيت مفزوعة، قلبي بيخبط جامد، مش قادرة أتنفس.
مكنتش فاهمة حاجة، بس حسيت إن في حاجة شر بدأت
زي روح اتحررت ومحدش يقدر يوقفها.
الوقت عدى بس الأحلام موقفتش عادي
كانت بتيجي كل يوم، وبقت أوضح وأقرب للحقيقة.
في يوم حلمت إني رايحة السوبر ماركت مع واحدة معرفهاش
روحت على قسم الألعاب، كنت بفكر في ابني الصغير،
الست قالتلي "طب ما تاخدي عربية واسرقيها"
قولت لها لأ
خرجنا، ولقيت نفسي مع ولادي الأتنين.
قربنا من بيت طليقي، هو وعيلته كانوا واقفين بره
أنا شايفاه بس أولادي مش شايفينه
قالولي
"يلا نروح بيت تيتا"
وأنا حسيت اني اتشليت علشان أنا عارفه إن كل مرة بحلم ببيت أمي، بيحصل مصيبة.
روحت
دخلت الأوضة اللي كانت بتنام فيها قبل ما تموت، ولقيت عيلة جوزي موجودة، وعلى السرير، كانت حماتي
ميتة بس كانت بتبصلي.
كنت رايحة أقعد جنبها، بس وقفتني وقالت
"ده مش وقتك"
خرجت ولقيت حد بيخبط
فتحت، لقيته طليقي، ماسك
ابن أخوه.
قاللي
"تعالي ناكل نوتيلا"
مكنتش عايزة بس وافقت
مشينا سوا لآخر الشارع، هناك وقف، وبصلي بنظرة غريبة قوي، وقاللي
"هنا هنتفارق"
وسابني ومشي
بعد 15 يوم، مات في حادثة عربية في نفس المكان اللي سابني فيه.
بس دي مكنتش نهاية الحكاية.
قبل وفاة أمي بوقت قصير، حلمت بأخويا المتوفي لابس أبيض، جالي وقالي
"هسيبك رايح بيت أمي."
بعدها بيومين
أمي ماتت بسكتة قلبية.
من ساعتها، وأنا بخاف أنام، بخاف أحلم
أنا عارفه، لما بشوف بيت أمي، أو لما حد ميت ييجي يكلمني
يبقى في حاجه جايه.
وحتى لو مش بطلب الرسايل
اتعلمت إن الأحلام بتتكلم
وأوقات، بتوجع.
النهاية
